Asteo Red Neutra, unha das compañías de Rurix, recibiu o premio «Independent Fibre Provider of the Year» nos Global Connectivity Awards, celebrados en Londres durante Capacity Europe. O galardón recoñece a contribución de Asteo ao despregamento de infraestruturas de fibra óptica e á conectividade no medio rural.

Durante o encontro, Asteo presentou o corredor de conectividade entre España e Portugal, desenvolvido no marco do proxecto Asteo Venus e do acordo con MEO Wholesale Solutions. A iniciativa impulsa novas solucións de capacidade, Longhaul e transmisión de longa distancia para reforzar as comunicacións dixitais na península ibérica.

A vindeira cita será en Bruxelas: o proxecto Asteo Venus España–Portugal foi seleccionado como finalista dos European Digital Connectivity Awards 2026, na categoría «Cross-border and international connectivity». O premio fallarase o 2 de decembro.

Asteo Venus contempla novas rutas terrestres de longa distancia, alternativas e complementarias ás existentes. O seu obxectivo é aumentar a capacidade, a seguridade e a resiliencia das comunicacións entre España e Portugal.

O proxecto aproveitará tramos da rede de Asteo e atravesará zonas rurais. Tamén facilitará o acceso a infraestruturas de alta capacidade para operadores de telecomunicacións, centros de datos e hiperescalares.

A iniciativa conta con financiamento da Unión Europea a través do programa Connecting Europe Facility (CEF) Digital, xestionado por HaDEA.